Diskùsjowi Klub Kaszëbsczi Ksążczi rëgnął 13 rujana w Gardowi Pùbliczny Bibliotece w Wejrowie, òd jaczi wëszła ùdba jegò założeniô. Mòderatorã je przédny redaktor cządnika „Pomerania” Dariusz Majkòwsczi. Célã Klubù je m. jin. pòznôwanié i promòwanié kaszëbsczi lëteraturë.
Pierszim tekstã, ò jaczim diskùtowelë ùczãstnicë zéńdzeniô DKKK, bëło òpòwiôdanié „Kôlp” Kristinë Léwnë. Gôdka tikała sã m.jin. prowadzeniô fabùłë, symbòlów, pòdskacënków i lëteracczich mòdłów, jaczé jidze nalezc w dokazu.
Wikszosc pòzeszłëch to kaszëbsczi pisarze i pòecë (wezmë na to Stanisłôw Janka czë Róman Drzéżdżón), tej szukelë w teksce Léwnë téż nôùczi dlô swòjégò ùtwórstwa. Òbczas diskùsje ùdało sã nalezc w tim òpòwiôdaniu wiele òdnieseniów do prozë i symbòliczi Jana Drżéżdżona i jinëch nordowëch lëteratów.
Na placu bëła téż aùtorka, chtërna òdpòwiôdała na pitania ùczãstników zéńdzeniô.
Diskùsjowi Klub Kaszëbsczi Ksążczi to òtemkłé karno. Jegò zéńdzenia mdą miesąc w miesąc. Kòżdi lubòtnik lëteraturë mòże brac ùdzél w diskùsjach.
Wszelejaczé infòrmacje ò témach pòtkaniów i terminach bãdą sã pòjôwiałë na internetowi starnie biblioteczi. W smùtanie ùczãstnicë mdą gôdelë ò dokazu R. Drzéżdżona „Chceta wiãcy krwi”. Jeżlë chtos chce gò przeczëtac przed zéńdzenim, mòże zgłosëc to w bibliotece i pòżëczëc ksążkã z tim òpòwiôdanim.